କଣ ଏହି ଶକ୍ତିଶ୍ରୀ, ଶିକ୍ଷାନୁଷ୍ଠାନରେ ଏହାର କାର୍ଯ୍ୟ କଣ ?

ରାଜ୍ୟରେ 15 ଦିନ ଭତରେ ଦୁଇଟି ଶନିବାର ଦୁଇଟି ବଡ଼ ଘଟଣା ଘଟିବା ପରେ ସେହି ଶନିବାର ଶକ୍ତିଶ୍ରୀ ପ୍ରୟୋଗ କଲେ ରାଜ୍ୟ ସରକାର। ନିଜେ ମୁଖ୍ୟମନ୍ତ୍ରୀ ମୋହନ ମାଝୀ ପ୍ରାଇମଟାଇମ ବୁଲେଟିନ ସମୟରେ ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାର ଛାତ୍ରୀ, ଓ ନାରୀ ସୁରକ୍ଷାକୁ କେତେ ଗମ୍ଭୀରତାର ସହିତ ନେଇଛନ୍ତି ତାହା ବଖାଣିଛନ୍ତି। ଏଥିସହିତ ମଧ୍ୟ ଘଟଣା ପଛରେ ଯିଏ ଥାଆନ୍ତୁ ନା କାହିଁକି ଏପରିକି ଯଦି ଷଡ଼ଯନ୍ତ୍ର ହୋଇଥିବେ ତାହେଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସନ୍ଦେଶ ଦେଇଛନ୍ତି । ଏଥିସହିତ ମୁଖ୍ୟମନ୍ତ୍ରୀ କଲେଜ ଓ ବିଶ୍ବ ବିଦ୍ୟାଳୟଗୁଡିକ ପାଇଁ ଶକ୍ତିଶ୍ରୀ କାର୍ଯ୍ୟକ୍ରମର ଶୁଭାରମ୍ଭ କରିଛନ୍ତି ।
ଆସନ୍ତୁ ଜାଣିବା କଣ ଏହି ଶକ୍ତି ଶ୍ରୀ, କାହା ପାଇଁ ଏହା ଉଦ୍ଦିଷ୍ଟ। ରାଜ୍ୟର ୧୬ଟି ବିଶ୍ବବିଦ୍ୟାଳୟ ଓ ୭୩୦ଟି ସରକାରୀ ଓ ଅନୁଦାନପ୍ରାପ୍ତ ମହାବିଦ୍ୟାଳୟରେ ଅଧ୍ୟୟନରତ ଛାତ୍ରୀଙ୍କ ପାଇଁ ଏହା କାର୍ଯ୍ୟକାରୀ କରାଯିବ । ଶିକ୍ଷାନୁଷ୍ଠାନରେ ଏକ ସୁରକ୍ଷିତ ଶୈକ୍ଷକ ବାତାବରଣ ପାଇଁ ସ୍ନାତକ ଓ ସ୍ନାତକୋତ୍ତର ଛାତ୍ରୀଙ୍କ ସୁରକ୍ଷା ଉଦ୍ଦେଶ୍ୟରେ ହିଁ ଏହି ଶକ୍ତିଶ୍ରୀ କାର୍ଯ୍ୟକ୍ରମ ଆରମ୍ଭ ହୋଇଛି। ଯେଉଁଥିରେ ଛାତ୍ରୀମାନଙ୍କୁ ପ୍ରଶିକ୍ଷଣ ବ୍ୟବସ୍ଥା ରହିଛି। ଛାତ୍ରୀମାନଙ୍କର ସଶକ୍ତୀକରଣ, ସର୍ବାଙ୍ଗୀନ ବିକାଶ କଲେଜସ୍ତରରେ କରାଯାଇପାରିବା ପାଇଁ ଏଥିରେ ଲକ୍ଷ୍ୟ ରଖାଯାଇଛି। ୮ଟ ପ୍ରମୁଖ ଦିଗ ଉପରେ ରାଜ୍ୟ ସରକାର ଗୁରୁତ୍ବ ଦେଉଥିବା ମୁଖ୍ୟମନ୍ତ୍ରୀ କହିଛନ୍ତି ।

▶️ଉଚ୍ଚଶିକ୍ଷା ବିଭାଗ ଅଧୀନରେ ଥିବା ୧୬ଟି ବିଶ୍ୱବିଦ୍ୟାଳୟ ଏବଂ ୭୩୦ଟି ସରକାରୀ ଓ ଅନୁଦାନପ୍ରାପ୍ତ ମହାବିଦ୍ୟାଳୟରେ ଆରମ୍ଭ ହେବ “ଶକ୍ତିଶ୍ରୀ କାର୍ଯ୍ୟକ୍ରମ”

▶️ଏନେଇ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ

▶️ସୁରକ୍ଷିତ ଶୈକ୍ଷିକ ବାତାବରଣକୁ ସୁନିଶ୍ଚିତ କରାଇବା ଏହି କାର୍ଯ୍ୟକ୍ରମର ଉଦ୍ଦେଶ୍ୟ#ShaktiShree @MohanMOdisha pic.twitter.com/nfopHWqjCG

— DD News Odia (@DDNewsOdia) July 19, 2025

ମୁଖ୍ୟମନ୍ତ୍ରୀ କହିଛନ୍ତି, ଶକ୍ତିଶ୍ରୀ ଯୋଜନା ମାଧ୍ୟମରେ ମହାବିଦ୍ୟାଳୟ ଓ ବିଶ୍ବବିଦ୍ୟାଳୟରେ ‘ଶକ୍ତିଶ୍ରୀ ସଶକ୍ତୀକରଣ କେନ୍ଦ୍ର ପ୍ରତିଷ୍ଠା’ କରାଯିବ । ଏହାକୁ ଛାତ୍ରୀମାନେ ପରିଚାଳନା କରିବେ । ଛାତ୍ରୀମାନେ ଶକ୍ତିଶ୍ରୀ ଭାବେ କାମ କରିବେ । ଜିଲ୍ଲାପାଳଙ୍କ ଦ୍ବାରା ମନୋନୀତ ୫ ଜଣ ମହିଳା ଶକ୍ତିଶ୍ରୀ ଅପା ଭାବେ ଏଥିରେ ସାମିଲ ହେବେ । ଯେଉଁମାନେ ୩ ମାସରେ ଥରେ ଶିକ୍ଷାନୁଷ୍ଠାନ ପରିଦର୍ଶନ କରିବେ ଏବଂ ଶୈକ୍ଷିକ ବାତାବରଣର ତର୍ଜମା କରିବେ। ଛାତ୍ରୀମାନଙ୍କ ପାଇଁ ୬ଦିନିଆ କାର୍ଯ୍ୟକ୍ରମର ଆୟୋଜନ କରାଯିବ। ଏଥିରେ ସୁରକ୍ଷା ସଂପର୍କିରେ ଛାତ୍ରୀମାନଙ୍କୁ ସଚେତନ କରାଯିବ । ଶକ୍ତିଶ୍ରୀ ମୋବାଇଲ ଆପର ଶୁଭାରମ୍ଭ ହେବ । ଛାତ୍ରୀମାନଙ୍କ ଅଭିଯୋଗ ପାଇଁ ମଧ୍ୟ ଏକ ସୁସ୍ଥ ବାତାବରଣ ସୃଷ୍ଟି କରିବା ପାଇଁ ଏଥିରେ ବାର୍ତ୍ତା ଦିଆଯାଇଛି। ଯେତେବେଳେ ଛାତ୍ରୀମାନେ କୌଣସି ଅଭିଯୋଗ ଆଣିବେ ନିଜର ନାମ ଗୋପନ ରଖି ତାହା କରିପାରିବେ। ସେହିପରି ଛାତ୍ରୀମାନେ ମାନସିକ ସ୍ବାସ୍ଥ୍ୟ ବିଶେଷଜ୍ଞଙ୍କ ସହିତ ମଧ୍ୟ କଥା ହୋଇପାରିବେ।

#Odisha takes a bold step with the #Shaktishree Initiative to ensure safer campuses for women. pic.twitter.com/eRzFhpeYUK

— CMO Odisha (@CMO_Odisha) July 19, 2025

ଏହା ବାଦ ଏକ ବଡ଼ ବାର୍ତ୍ତା ମଧ୍ୟ ମୁଖ୍ୟମନ୍ତ୍ରୀ ଦେଇଛନ୍ତି ଯେଉଁଥିରେ ଶିକ୍ଷକମାନଙ୍କ ଆଚରଣ ବାବଦରେ ମଧ୍ୟ ସତର୍କ କରିଦେଇଛନ୍ତି । ଶିକ୍ଷକମାନଙ୍କ ପାଇଁ କୋର୍ଡ ଅଫ୍ କଣ୍ଟକ୍ଟ ଲାଗୁ ହେବ। ସେମାନଙ୍କର ପାଇଁ ମଧ୍ୟ କାର୍ଯ୍ୟକ୍ରମ ହେ ବ। ଲିଙ୍ଗଗତ ସମାନତା ପାଇଁ ଅଭିଯାନ ଜାରି ରହିବ। ୨ଥର ୱାର୍କସପ କରାଯିବ। କ୍ୟାମ୍ପସ ସୁରକ୍ଷା ନେଇ ପ୍ରତି କଲେଜ ଏକ ବାର୍ଷିକ ରିପୋର୍ଟ ପ୍ରସ୍ତୁତ କରିବେ। ଏହା ବାଦ ଆଉ ଏକ ବଡ଼ କଥା ହେଲା ଶକ୍ତିଶ୍ରୀ ଆପର ମଧ୍ୟ ଆରମ୍ଭ କରାଯିବ। ଯେଉଁଥିରେ ପଞ୍ଜୀକରଣ କରି ଛାତ୍ରୀମାନେ ନିଜର ସମସ୍ତ ତଥ୍ୟକୁ ଏଥିରେ ପ୍ରକାଶ କରିପାରିବେ ଏବଂ ସହାୟତା ନେଇପାରିବେ।