ଭୁବନେଶ୍ଵର, ୦୮/୦୬ : ଦୈନନ୍ଦିନ ଜୀବନରେ ଅନେକ ଥର ପ୍ଲାଷ୍ଟିକ୍ ବୋତଲ ବ୍ୟବହାର କରୁ। ବିଶେଷକରି ଆମେ ବାହାରକୁ ଯିବା ସମୟରେ ଘରୁ ପ୍ଲାଷ୍ଟିକ ବୋତଲରେ ପାଣି ନେଇ ଥାଉ। ଅନେକ ଲୋକ ବ୍ୟବହାର ପରେ ଏହି ପ୍ଲାଷ୍ଟିକ୍ ବୋତଲଗୁଡ଼ିକୁ ଏଣେତେଣେ କିମ୍ବା ଅଳିଆଗଦାରେ ପକାନ୍ତି, ଯାହା ପରିବେଶ ପାଇଁ ଆଦୌ ଭଲ ନୁହେଁ।
ଭାରତ ବାର୍ଷିକ ପ୍ରାୟ ୩୪ ଲକ୍ଷ ଟନ୍ ପ୍ଲାଷ୍ଟିକ୍ ଉତ୍ପାଦନ କରେ। ଯାହା ଅଣ-ଜୈବ ଡିଗ୍ରେଡେବଲ୍ ଏବଂ ପୁନଃବ୍ୟବହାର ହୋଇପାରିବ ନାହିଁ । ଏହି ସମସ୍ୟାର ସମାଧାନ ପାଇଁ, ଔରଙ୍ଗାବାଦର ଦୁଇ ବନ୍ଧୁ ନମିତା କପାଲେ ଏବଂ କଲ୍ୟାଣୀ ଭାରମ୍ବେ ଏକ ନିଆରା ଉପାୟ ବାହାର କରି ୧୬୦୦୦ ପ୍ଲାଷ୍ଟିକ୍ ବୋତଲରୁ ଏକ ପରିବେଶ ଅନୁକୂଳ ଘର ତିଆରି କରିଛନ୍ତି। ଗାଇ ଗୋବର, ମାଟି ଏବଂ ପ୍ଲାଷ୍ଟିକରେ ନିର୍ମିତ ଇକୋ-ଇଟା ବ୍ୟବହାର କରି ସେମାନେ ଘର ତିଆରି କରିଛନ୍ତି। ଦୌଲତାବାଦ ନିକଟ ସମ୍ୱାଜୀ ନଗରରେ ଅବସ୍ଥିତ ଏହି ଘର ‘ଭାଭର୍’ ୪ ହଜାର ବର୍ଗଫୁଟ ଉପରେ ବ୍ୟାପିଛି। ଏହାକୁ ତିଆରି କରିବା ପାଇଁ ୧୨ ରୁ ୧୩ ଟନ୍ ପ୍ଲାଷ୍ଟିକ, ଗୋବର ଏବଂ ମାଟିର ବ୍ୟବହାର କରାଯାଇଛି। ଯାହା ଏହାକୁ ସମ୍ପୂର୍ଣ୍ଣ ପରିବେଶ ଅନୁକୂଳ କରିଥାଏ।
୨୦୨୦ରେ, ନମିତା ଏବଂ କଲ୍ୟାଣୀ ଔରଙ୍ଗାବାଦର ସରକାରୀ କଲେଜ ଅଫ୍ ଆର୍ଟ ଆଣ୍ଡ ଡିଜାଇନରୁ ଚିତ୍ରକଳାରେ ସ୍ନାତକ ହାସଲ କରିଥିଲେ। ସେମାନଙ୍କ କଲେଜ ଦିନରୁ, ଦୁହେଁ ଏକ ସ୍ଥାୟୀ ଏବଂ ପରିବେଶ ଅନୁକୂଳ ଗୃହ ନିର୍ମାଣ କରିବାକୁ ଚାହୁଁଥିଲେ। ସେ ଏହା ପାଇଁ ଅନୁସନ୍ଧାନ ଆରମ୍ଭ କରିଥିଲେ ଏବଂ ୨୦୨୧ରେ ଲକଡାଉନ ସମୟରେ ଆସାମର ଗୁଆହାଟୀର ପାମୋହି ଗ୍ରାମରେ ଅବସ୍ଥିତ ଅକ୍ଷର ବିଦ୍ୟାଳୟ ବିଷୟରେ ଜାଣିବାକୁ ପାଇଥିଲେ। ଏହି ବିଦ୍ୟାଳୟ ଖାଲି ପ୍ଲାଷ୍ଟିକ ବୋତଲରେ ସିମେଣ୍ଟ ଭର୍ତ୍ତି କରି ଛାତ୍ରମାନଙ୍କ ପାଇଁ ସିଟ୍ ତିଆରି କରିଥିଲା।
ନମିତା କହିଛନ୍ତି ଯେ ଔରଙ୍ଗାବାଦର ସରକାରୀ ଇଞ୍ଜିନିୟରିଂ କଲେଜର ସିଭିଲ ଲ୍ୟାବ ଇଞ୍ଜିନିୟରମାନେ ମଧ୍ୟ ଏହି ପ୍ଲାଷ୍ଟିକ ବୋତଲଗୁଡ଼ିକର ଗୁଣବତ୍ତା ଯାଞ୍ଚ କରିଛନ୍ତି। ସିମେଣ୍ଟ ବଦଳରେ ଏହାକୁ ତିଆରି କରିବା ପାଇଁ ଏକ ସ୍ୱତନ୍ତ୍ର ପ୍ରକାରର ମାଟି ବ୍ୟବହୃତ ହୋଇଛି, ଯେଉଁଥିପାଇଁ ଏହି ଘର ବହୁତ ଶକ୍ତିଶାଳୀ। ଆହୁରି କୌଣସି ଋତୁରେ ଏଠାରେ ଏସି କିମ୍ବା ହିଟରର କୌଣସି ଆବଶ୍ୟକତା ନାହିଁ। କାଦୁଅ ଏବଂ ପ୍ଲାଷ୍ଟିକରେ ନିର୍ମିତ ଏହି ଘରର ନିର୍ମାଣ ମୂଲ୍ୟ ବର୍ଗଫୁଟ ପ୍ରତି ମାତ୍ର ୭୦୦ ଟଙ୍କା, ଯାହା ସାଧାରଣ ଘରର ମୂଲ୍ୟଠାରୁ ପ୍ରାୟ ୫୦% କମ୍।
