Home India ଆଜାଦୀର ଅମୃତ ମହୋତ୍ସବ ପାଳନ କରୁଛି ଭାରତ, ଏହି ଅବସରରେ ଜାଣନ୍ତୁ ସ୍ଵାଧିନତା ଦିବସ ସମ୍ପର୍କିତ କିଛି ଜଣା ଅଜଣା କଥା…

ଆଜାଦୀର ଅମୃତ ମହୋତ୍ସବ ପାଳନ କରୁଛି ଭାରତ, ଏହି ଅବସରରେ ଜାଣନ୍ତୁ ସ୍ଵାଧିନତା ଦିବସ ସମ୍ପର୍କିତ କିଛି ଜଣା ଅଜଣା କଥା…

0
ଆଜାଦୀର ଅମୃତ ମହୋତ୍ସବ ପାଳନ କରୁଛି ଭାରତ, ଏହି ଅବସରରେ ଜାଣନ୍ତୁ ସ୍ଵାଧିନତା ଦିବସ ସମ୍ପର୍କିତ କିଛି ଜଣା ଅଜଣା କଥା…

ଭୁବନେଶ୍ଵର,୧୫/୮ : ୭୬ତମ ସ୍ୱାଧୀନତା ଦିବସ ସଗର୍ବେ ପାଳନ କରୁଛି ଭାରତ। ଚାରିଆଡ଼େ ତ୍ରିରଙ୍ଗା ରଙ୍ଗରେ ରଙ୍ଗାୟିତ। ସବୁଠି ଆନନ୍ଦଉଲ୍ଲାସର ମାହୋଲ । ପ୍ରତ୍ୟେକ ଭାରତୀୟଙ୍କ ହୃଦୟରେ ଦେଶପ୍ରେମର ଭାବନା ଉକୁଟି ଉଠୁଛି । ସ୍ୱାଧୀନତାର ଏହି ଅମୃତ ମହୋତ୍ସବକୁ ନେଇ ସମସ୍ତେ ଉନ୍ମାଦିତ, ଉଲ୍ଲସିତ ଓ ଉତ୍‌ଫୁଲ୍ଲିତ । ଚଳିତବର୍ଷ ଭାରତ ସରକାର ଦେଶର ଏହି ମହାନ୍‌ ପର୍ବକୁ ଭିନ୍ନ ଢଙ୍ଗରେ ପାଳନ କରୁଛନ୍ତି । ଏଥିପାଇଁ ନୂଆ ଅଭିଯାନ ‘ହର୍‌ ଘର୍‌ ତିରଙ୍ଗା’ ଆରମ୍ଭ କରିଛନ୍ତି । ହର୍‌ ଘର୍‌ ତିରଙ୍ଗା ଅଭିଯାନରେ ପ୍ରତ୍ୟେକ ଦେଶବାସୀ ସାମିଲ ହୋଇ ଅଗଷ୍ଟ ୧୩ ତାରିଖରୁ ନିଜ ଘର ଛାତ ଉପରେ, ବାଲ୍‌କୋନିରେ ତ୍ରିରଙ୍ଗା ପତାକା ଲଗାଇଥିବା ଦେଖିବାକୁ ମିଳିଛି । ତେବେ ସ୍ଵାଧୀନତା ଦିବସ ଅବସରରେ ଜାଣନ୍ତୁ କିଚି ଜଣା ଅଜଣା କଥା…

ତ୍ରିରଙ୍ଗାର ରୂପକାର ପିଙ୍ଗଳି ଭେଙ୍କେୟା…
ଆଜିର ଭାରତୀୟ ଜାତୀୟ ପତାକା ଯେଉଁ ପତାକା ଉପରେ ପର୍ଯ୍ୟବସିତ ହୋଇଛି ପିଙ୍ଗଳି ଭେଙ୍କେୟା ତାକୁ ଡିଜାଇନ୍‌ କରିଥିଲେ । ସେ ଆନ୍ଧ୍ରପ୍ରଦେଶର ବାସିନ୍ଦା ଥିଲେ । ମାତ୍ର ୧୯ ବର୍ଷର ହୋଇଥିବାବେଳେ ସେ ବ୍ରିଟିଶ ଭାରତୀୟ ସେନାରେ ଯୋଗ ଦେଇଥିଲେ । ସେତେବେଳେ ତାଙ୍କୁ ଦକ୍ଷିଣ ଆଫ୍ରିକାରେ ମୁତୟନ କରାଯାଇଥିଲା । ଯୁଦ୍ଧ ସମୟରେ ସୈନିକମାନେ ବ୍ରିଟେନ୍‌ର ଜାତୀୟ ପତାକାକୁ ସାଲ୍ୟୁଟ୍‌ କରୁଥିବା ଦେଖି ଭେଙ୍କେୟା ଭାରତୀୟଙ୍କ ଲାଗି ଏକ ପତାକାର ଆବଶ୍ୟକତାକୁ ଅନୁଭବ କଲେ । ପରେ ଯେତେବେଳେ ସେ ୧୯୦୬ ମସିହାରେ କୋଲକାତାରେ ଏଆଇସିସିର ଅଧିବେଶନରେ ସାମିଲ ହେଲେ ଭାରତୀୟ ଜାତୀୟ କଂଗ୍ରେସ ଲାଗି ଏକ ପତାକା ପ୍ରସ୍ତୁତ କରିବାକୁ ପ୍ରେରିତ ହୋଇଥିଲେ । ୧୯୨୧ ମସିହାରେ ମହାତ୍ମା ଗାନ୍ଧିଙ୍କ ବିଜୟୱାଡ଼ା ଗସ୍ତ ସମୟରେ ସେ ଏକ ପତାକା ଡିଜାଇନ୍‌ କରି ତାଙ୍କୁ ଦେଲେ । ସେତେବେଳେ ସେଥିରେ ନାଲି ଓ ସବୁଜ ଦୁଇଟି ରଙ୍ଗର ପଟି ଥିଲା । ଗାନ୍ଧିଜୀଙ୍କ ପରାମର୍ଶ ଅନୁସାରେ ଭେଙ୍କେୟା ଭାରତର ଅନ୍ୟ ସବୁ ଧର୍ମକୁ ପ୍ରତିନିଧିତ୍ୱ କରିବା ଲାଗି ଏକ ଧଳା ରଙ୍ଗର ପଟି ସେଥିରେ ଯୋଗ କଲେ । ୧୯୨୧ ମସିହା ପରଠାରୁ ଭେଙ୍କେୟାଙ୍କ ପତାକାକୁ କଂଗ୍ରେସର ସବୁ ବୈଠକରେ ବ୍ୟବହାର କରାଯାଉଥିଲା । ପରବର୍ତ୍ତୀ ସମୟରେ ସେହି ପତାକାରେ କିଛି ପରିବର୍ତ୍ତନ କରି ୧୯୪୭, ଜୁଲାଇ ୨୨ରେ ସମ୍ବିଧାନ ସଭାର ବୈଠକରେ ତାକୁ ଭାରତର ଜାତୀୟ ପତାକା ଭାବେ ସ୍ୱୀକାର କରାଗଲା ।

କଟକରେ ଉଡ଼ିଥିଲା ପ୍ରଥମ ତ୍ରିରଙ୍ଗା…
ଅନେକ ଇତିହାସର ମୂକସାକ୍ଷୀ କଟକ । ଓଡ଼ିଶାରେ ପ୍ରଥମ ତ୍ରିରଙ୍ଗା କଟକରେ ହିଁ ଉଡ଼ିଥିଲା । ଦେଶ ସ୍ୱାଧୀନତାର ୭୫ ବର୍ଷ ପୂର୍ତ୍ତିକୁ ମହାଡ଼ମ୍ବରରେ ପାଳନ କରୁଥିବା ବେଳେ କଟକ ଏବେ ସେ ଦିନର ସେହି ମହାର୍ଘ୍ୟ ମୁହୂର୍ତ୍ତକୁ ମନେ ପକାଉଛି । ଏହି ସହର ବୁକୁରେ ସାଇତା ହୋଇ ରହିଛି ଅନେକ ଘଟଣା ଓ ଅଘଟଣର ପ୍ରତିଛବି । ନବକୃଷ୍ଣ ଚୌଧୁରୀ କଟକ ବାଖରାବାଦର ନିଜ ଘର ଛାତ ଉପରେ ଉଡ଼େଇଲେ ଜାତୀୟ ପତାକା ‘ତ୍ରିରଙ୍ଗା’ । ଆଜି ବାଖରାବାଦ୍‌ର ସେହି ଐତିହାସିକ ଘରକୁ ଦେଖିଲେ ସେଦିନର କଥାକୁ ଲୋକେ ମନେ ପକାଇଥାନ୍ତି । ଏହି ଘରେ ସ୍ୱାଧୀନତା ଆନ୍ଦୋଳନର ବାନରସେନାଙ୍କ ରାଜ୍ୟ କାର୍ଯ୍ୟାଳୟ ଥିଲା । ଇଞ୍ଚୁଡ଼ି ଲବଣ ସତ୍ୟାଗ୍ରହ ଯାତ୍ରା ଏହି ଘରୁ ବାହାରିଥିଲା । ଏବେ ଏହି କୋଠାର ପରିସରରେ ଉତ୍କଳ ଗାନ୍ଧୀ ସ୍ମାରକନିଧି ନାମକ ଅନୁଷ୍ଠାନ ଗଢ଼ି ଉଠିଛି ।

ଜାତୀୟ ସଙ୍ଗୀତର ଅଜଣା କଥା…
ଜାତୀୟ ପତାକା ଭଳି କୋଟି କୋଟି ଭାରତବାସୀଙ୍କ ହୃଦୟରେ ଦେଶପ୍ରେମର ବହ୍ନି ଜାଗ୍ରତ କରିଥାଏ ଜାତୀୟ ସଙ୍ଗୀତ ‘ଜନ ଗଣ ମନ’ । ବିଶ୍ୱକବି ରବୀନ୍ଦ୍ରନାଥ ଟାଗୋର ଏହି ଗୀତର ରଚୟିତା । ଏହା ମୂଳତଃ ବଙ୍ଗଳା ଭାଷାରେ ରଚିତ ହୋଇଥିଲା । ଏଥିରେ ୫ଟି ପଦ ଥିଲା । ୧୯୧୧ ମସିହା ଡିସେମ୍ବର ୨୭ ତାରିଖରେ ଭାରତୀୟ ଜାତୀୟ କଂଗ୍ରେସର କୋଲକାତା ଅଧିବେଶନରେ ଏହାକୁ ଗାନ କରାଯାଇଥିଲା । ପରେ ୧୯୫୦ ମସିହା ଜାନୁୟାରୀ ୨୪ ତାରିଖରେ ସମ୍ବିଧାନ ସଭା ଦ୍ୱାରା ଏହାର ପ୍ରଥମ ପଦକୁ ଜାତୀୟ ସଙ୍ଗୀତ ଭାବେ ମାନ୍ୟତା ଦିଆଯାଇଥିଲା । ଜାତୀୟ ସଙ୍ଗୀତ ଗାନ କରିବାକୁ ପ୍ରାୟତଃ ୫୨ ସେକେଣ୍ଡ ସମୟ ଲାଗିଥାଏ । ସ୍ଥଳ ବିଶେଷରେ ଏହାର ସଂକ୍ଷିପ୍ତ ରୂପ ମଧ୍ୟ ଗାନ କରାଯାଇଥାଏ । ସେଥିଲାଗି ୨୦ ସେକେଣ୍ଡ ସମୟ ଲାଗେ ।

LEAVE A REPLY

Please enter your comment!
Please enter your name here